Çfarë është biopsia e traktit tretës?

Biopsia e traktit tretës është një procedurë diagnostikuese që përdoret për:

• Vlerësimin e ndryshimeve të dyshimta në mukozën e traktit tretës.
• Konfirmimin e inflamacionit, infeksioneve ose dëmtimeve të indeve.
• Diagnostikimin e sëmundjeve autoimune, si sëmundja e celiakisë.
• Zbulimin e polipeve ose tumoreve.
• Identifikimin e infeksionit me Helicobacter pylori.

Gjatë procedurës, mjeku merr mostra shumë të vogla indi (biopsi), të cilat dërgohen për ekzaminim histopatologjik në laborator, ku analizohen në mikroskop nga mjeku patolog për të vlerësuar ndryshimet qelizore dhe për të vendosur diagnozën përfundimtare.
Për më shumë informacion mbi këtë proces, shikoni faqen e ekzaminimit histopatologjik.

---

Kur rekomandohet biopsia e traktit tretës?

Biopsia e traktit tretës rekomandohet kur mjeku vëren ndryshime të dyshimta gjatë gastroskopisë ose kolonoskopisë, ose kur pacienti paraqet simptoma që kërkojnë konfirmim histologjik, si:

• Dhimbje barku të vazhdueshme.
• Diarre kronike ose fryrje të barkut.
• Të përziera apo të vjella të përsëritura.
• Të vjella me gjak ose gjak në jashtëqitje.
• Humbje peshe pa shkak të qartë.
• Vështirësi ose dhimbje gjatë gëlltitjes.
• Anemi pa shkak të qartë.

Si kryhet biopsia e traktit tretës?

Biopsia e traktit tretës nuk është një procedurë më vete, por ajo kryhet gjatë gastroskopisë ose kolonoskopisë.

Gjatë kësaj procedure:

• Mjeku vëzhgon drejtpërdrejt mukozën e brendshme.
• Me një pincetë (forceps) shumë të hollë merren mostra shumë të vogla indi.
• Mostrat vendosen në solucion fiksues (formalinë) dhe dërgohen për ekzaminim histopatologjik.
• Marrja e mostrës nuk dëmton mukozën dhe nuk shkakton dhimbje.

Biopsia kryhet nën sedacion dhe është pa dhimbje, pasi mukoza ka pak receptorë të dhimbjes. 😴

---

Si të përgatitemi për biopsinë e traktit tretës?

Përgatitja për biopsinë e traktit tretës është e njëjtë me përgatitjen për ekzaminimin endoskopik gjatë të cilit ajo kryhet.

• Nëse biopsia kryhet gjatë gastroskopisë, ndiqni udhëzimet për përgatitjen për gastroskopi.
• Nëse biopsia kryhet gjatë kolonoskopisë, ndiqni udhëzimet për përgatitjen për kolonoskopi.

Udhëzimet e detajuara për përgatitjen i gjeni në faqet përkatëse të këtyre ekzaminimeve.

---

Çfarë ndodh pas procedurës?

Pas marrjes së mostrës për biopsi:

• Mund të ndjeni fryrje barku ose gazra përkohësisht (nëse biopsia është marrë gjatë kolonoskopisë).
• Mund të keni parehati të lehtë në fyt (nëse biopsia është marrë gjatë gastroskopisë).
• Zona nga ku është marrë mostra shërohet spontanisht dhe nuk kërkon trajtim.

Nëse procedura është kryer nën sedacion, për kufizimet pas sedacionit dhe kujdesin pas procedurës, referojuni faqeve të gastroskopisë dhe kolonoskopisë.

---

A është biopsia e traktit tretës e rrezikshme?

Biopsia e traktit tretës është një procedurë shumë e sigurt. Komplikacionet janë të rralla, por gjithsesi të mundshme. Më të zakonshmet mund të përfshijnë:

• Gjakderdhje të lehtë nga vendi i marrjes së mostrës.
• Infeksion, në raste shumë të rralla.
• Perforim të murit të traktit tretës (jashtëzakonisht i rrallë – afërsisht 1 deri në 5 për çdo 10'000 raste).
• Reaksione ndaj sedacionit.

Mjeku ju informon paraprakisht për çdo rrezik të mundshëm dhe merr masat maksimale për sigurinë tuaj.

---

Pyetje të shpeshta

A është biopsia e e traktit tretës dhimbshme?
Jo. Biopsia kryhet nën sedacion dhe shumica e pacientëve nuk ndjejnë dhimbje. Ajo është zakonisht e rehatshme dhe tolerohet mirë.

Sa kohë zgjat biopsia e traktit tretës?
Vetë marrja e mostrës zgjat vetëm disa sekonda. Kohëzgjatja totale varet nga ekzaminimi endoskopik gjatë të cilit kryhet. Për detaje mbi kohëzgjatjen, referojuni faqeve të gastroskopisë dhe kolonoskopisë, por zakonisht ju duhet të llogarisni 2 deri në 3 orë të shpenzuara në klinikë, nga momenti që hyni dhe deri sa të dilni.

Kur dalin rezultatet e biopsisë së traktit tretës?
Përgjigjet e biopsisë varen nga rezultati i ekzaminimit histopatologjik, i cili kërkon mesatarisht nga 5 deri në 14 ditë për tu finalizuar. Për informacion më të detajuar mbi mënyrën e punimit, kohëzgjatjen e përgjigjes dhe raportin final shikoni faqen specifike të ekzaminimit histopatologjik.

A mund të shkoj në punë pas biopsisë?
Kufizimet pas procedurës varen nga ekzaminimi endoskopik gjatë të cilit është kryer biopsia. Zakonisht, mjeku rekomandon që të pushoni ditën e ekzaminimit, por për udhëzime të detajuara, referojuni faqeve të gastroskopisë dhe kolonoskopisë.

Ku mund ta kryej biopsinë e traktit tretës?
Biopsia e traktit tretës kryhet në Klinika Kajo në Tiranë, pranë Pallatit të Sportit Asllan Rusi. Për më tepër informacion rreth lokacionit shikoni faqen e kontaktit.

---

Kush e kryen biopsinë e traktit tretës në Klinika Kajo?

Biopsia e traktit tretës kryhet nga gastroenterologët tanë me përvojë, duke përdorur pajisje moderne dhe protokolle të avancuara sigurie.

• Prof. Asc. Dr. Ilir Kajo
• Dr. Silva Gjika
• Dr. Atea Guma

---

Rezervoni gastroskopinë ose kolonoskopinë me biopsi në Klinika Kajo

Nëse mjeku ju ka rekomanduar biopsi ose keni simptoma që kërkojnë vlerësim endoskopik, stafi ynë është gati t’ju ndihmojë.

Rezervoni një gastroskopi dhe/ose kolonoskopi në Klinika Kajo për të marrë kujdesin që meritoni. 📅

---

📌 Rishikuar nga Prof. Asc. Dr. Ilir Kajo, Gastro-Hepatolog, Endoskopist, Klinika Kajo

KUJDES! Teksti në këtë faqe është shkurtuar dhe thjeshtësuar për t'u bërë më i kuptueshem nga pacienti mesatar. Ai ka si qëllim informimin e publikut dhe nuk duhet në asnjë mënyrë të zëvendësojë konsultat mjekësore të specializuara.