Dieta per Kolitin Spastik (IBS)

Dieta, ushqimi dhe mënyra e të ushqyerit ndikojnë në simptomat e kolitit spastik. Shumë pacientë që vuajnë nga koliti spastik vënë re përkeqësim të simptomave pas ushqimit.

Ndikimi i dietës është unik te çdo person. Për këtë arsye nuk ka një dietë të përgjithshme e cila të funksionojë për çdo person. Këshillat e mëposhtme do t’ju ndihmojnë të keni nën kontroll sëmundjen tuaj.

• Vaktet tuaja duhet të jenë të vogla në sasi dhe të shumta në numër, jo e kundërta. E mira është të ndani ushqimin e 3 vakteve të zakonshme në 5 vakte.
• Konsumojeni ushqimin me ngadalë dhe duke e përtypur mirë atë.
• Shmangni ushqimet që ngacmojnë zorrën e kujtdo, si vaktet e bollshme dhe ushqimet e yndyrshme.
• Nëse vuani nga konstipacioni, konsumoni patjetër vaktin e mëngjesit, sepse ky vakt është ai që stimulon zorrën më së tepërmi.
• Nëse mendoni se një ushqim ju shkakton probleme, hiqeni nga dieta juaj përafërsisht 3 muaj. Nëse nuk ka ndryshim rifuteni në dietën tuaj. Nëse ka më shumë se një ushqim që ju shkakton probleme, provojeni këtë metodë vetëm me një ushqim e pastaj me tjetrin, në mënyrë që të identifikoni cili ushqim ju shkakton probleme.

Ushqimet më të mundshme për të shkaktuar problem janë:

• Fibrat e patretshme (gjenden te drithërat e papërpunuara, krundet).
• Kafeina (gjendet te kafja, çaji, coca-cola etj).
• Çokollata.
• Frutat e thata.
• Pijet alkoolike.
• Bulmeti.
• Ëmbëlsirat.
• Ushqimet e yndyrshme.
• Fruktoza (gjendet në mënyrë natyrale te mjalti dhe te disa lloje frutash).
• Sorbitol-i, Mannitol-i dhe Xylitol-i (ëmbëltues që gjenden në produktet pa sheqer si çamçakëzi, në disa ëmbëlsira dhe në disa medikamente).
• Duhani.
• Situatat emocionale.
• Stresi (zorra përmban fije nervore të cilat shkojnë deri në tru, dhe për pacientët që vuajnë nga koliti spastik stresi stimulon spazma në zorrë, të cilat shkaktojnë dhimbje dhe diskomfort).
• Ushqime të ndryshme shkaktojnë simptoma të ndryshme, ju duhet të dini të bëni diferencën midis tyre.

Për shembull, dhimbjet e barkut dhe diarreja mund të vijnë kryesisht nga:

• Vaktet e bollshme dhe/ose të yndyrshme.
• Ushqimet e skuqura.
• Kafeja.
• Pijet e tjera që përmbajnë kafeinë (çajrat, coca-cola etj).
• Pijet alkoolike.

Konsumi i tepërt i disa tipave të sheqerit, të cilët nuk thithen mirë nga zorra mund të shkaktojë gjithashtu dhimbje barku ose diarre. Disa shembuj përfshijnë:

• Sorbitoli – përdoret shpesh si ëmbëlsues në ushqime dietike, si ëmbëlsira dhe çamçakëzë, por dhe në disa lloje medikamentesh dhe vitaminash.
• Fruktoza – përdoret gjithashtu si ëmbëlsues dhe gjendet në mënyrë natyrale te mjalti dhe te disa lloje frutash.

Disa ushqime prodhojnë gazra dhe konsumi i tepërt i tyre shkakton gazra të tepërta në zorrë. Kjo bëhet akoma më problematike për pacientët që vuajnë nga koliti spastik, pasi theksojnë së tepërmi simptomat e fryrjes dhe dhimbjes së barkut. Disa shembuj ushqimesh që prodhojnë gazra përfshijnë:

• Fasulet.
• Lakrat.
• Bishtajoret (si bizelet, mashurkat, kikirikët etj).
• Lulelakra.
• Brokoli.
• Thjerzat.
• Lakrat e Brukselit.
• Rrushi i thatë.
• Qepët.
• Hudhrat.
• Frutat e thata (si arrat, bajamet, lajthitë etj).
• Fibrat e patretshme (gjenden te drithërat e papërpunuar, krundet).

Mënyra më e mirë për të menaxhuar kolitin spastik është të kuptoni se çfarë ua shkakton episodet e diskomfortit dhe të punoni për t’i eliminuar ose minimizuar ato. Medikamentet dhe menaxhimi i stresit janë vetëm gjysma e punës, gjysma tjetër është dieta dhe mënyra e të ushqyerit. Ndryshime të thjeshta në dietën tuaj, duke u bazuar dhe në sugjerimet e mësipërme, do t’ju ndihmojnë të luftoni simptomat dhe të dominoni sëmundjen.

Shkarko PDF:

KUJDES! Teksti në këtë faqe është shkurtuar dhe thjeshtësuar për t'u bërë më i kuptueshem nga pacienti mesatar. Ai ka si qëllim informimin e publikut dhe nuk duhet në asnjë mënyrë të zëvendësojë konsultat mjekësore të specializuara.